MCHEZA KIKAPU MAARUFU Rodman atetea safari yake Korea

Dennis Rodman na Rais wa Korea Kaskazini Kim Jong-un

Mchezaji mashuhuri za zamani wa mpira wa vikapu nchini Marekani Dennis Rodman ameteta vikali ziara yake ya Korea Kaskazini kabla ya mechi maalum ya kuadhimisha siku ya kuzaliwa kwa Rais wa nchi hiyo Kim Jong-un.

Katika mahojiano na shirika la habari la CNN, alihojiwa kuhusu ikiwa atazungumzia swala la mfungwa wa Marekani aliye kizuizini nchini humo.

Siasa

Jibu la Mchezaji huyo wa zamani lilionekana kumlaumu mfungwa huyo Kenneth Bae kwa masaibu yanayomkumba.

Ziara ya Rodman, imekosolewa na mashirika ya kutetea haki za binadamu, huku Marekani ikisema kuwa Rodman hawakilishi Marekani katika ziara yake.

Wachezaji wa iliyokuwa timu yake ya zamani ya NBA watamenyana na timu ya Korea Kaskazini katika mechi ya maonyesho siku ya Jumatano mjini Pyongyang.

Rodman anasema kuwa mechi hiyo ni ya kusherehekea siku ya kuzaliwa kwa Rais Kim Jong-un, ingawa siku rasmi ya kuzaliwa kwake pamoja na umri wake haijatangazwa rasmi.

Aidha ziara ya Rodman inakuja wiki chache baada ya kuuawa kwa mjombake Kim , Chang Song-thaek, ambaye wakati mmoja alioenekana kama mtu shupavu.

Kuuawa kwake kulizua wasiwasi kuhusu uthabiti wa nchi hiyo.

Wakati huohuo, uchaguzi wa wabunge nchini humo utafanyika tarehe 9 mwezi Machi. Wadadisi wanasema uchaguzi huo utatoa ishara ya nani wanasiasa wenye ushawishi mkubwa hasa baada ya Bwana Chang kuuawa.